Vikingpizza
Slik har du aldri laga pizza før. Oppskrifta rekk til ca 15 personar.
Oppskrifta inneheld nøtter, hugs å sjekke om nokon har allergi!
Dette treng du:
Utstyr:
- Stor morter eller ein sterk blender
- Knivar, skjerefjøl, rasp, 4 bakeboller
- Liten stamp el. liknande til å blande deigen
Ingrediensar:
- 2 boksar valnøtter
- 2 dl solsikkefrø
- 1/2 purre
- 2 fedd kvitlauk
- 2 glas soltørka tomater i olje
- 2 kg gulrot
- 2 hodekål
- 1 sitron
- 1 pose gjær
- 3-4 kg assortert mjøl (sammalt grov, sammalt fint og kvitt mjøl)
- Kayennepepar
- Salt
- Pepar
- Paprikapulver
- Olivenolje
- Sukker og kanel
- 1-2 buntar friske urter
Slik gjer du:
Gjer helst førebuingane til ein fellesaktivitet! Om du har ein morter kan alt kan lagast ute.
- Lag til pizzabunnen seinast 1,5 time før måltidet. Lag nøtteblandinga i morter på plassen eller dagen før i blender. Rasp toppinga like før servering.
- Klapp ut ein liten pizzabunn, på storleik med handflata di, og steik den på steikehelle over bålet.
- Når pizzabunnen er ferdig, legg du den på ein serviett eller eit fat, smør på nøtteblanding og strø deretter over kål og gulrot. Ha på friske urter på toppen, til dømes basilikum.
Pizzafyll:
Legg 2 boksar ferdig skrelte valnøtter og 2 dl solsikkefrø i bløyt i lunka vatn i 20 min. Tøm av vatnet. Hakk 1/2 purre og 2 fedd kvitlauk. Bruk helst ein stor morter og knus blandinga saman til ein masse. (Evt køyr alt i ein sterk blender.) Tilsett 1-2 glas soltørka tomatar med olje, 1/2 ts kayennepepar, 1 ts paprikapulver, litt salt og spe evt med god olivenolje. Smak deg fram! Fyllet skal vere smørbart, klumpete og smake funky-spicy!
Pizzabunn:
Her treng du 3-4 kg mjøl, ca 2 liter lunka vatn, 1 pose gjær og 2 dl olivenolje. Mjølblandinga skal vere 1/3 sammalt fint mjøl, 1/3 sammalt grovt mjøl og 1/3 del kvitt mjøl. Bland dei grove mjølsortane, gjær og litt salt til ein fuktig deig. La den heve nær bålet i 40 minutt. Tilsett deretter olivenolje og kvitt mjøl og la den heve litt til.
Topping:
Rasp gulrøter og kål i kvar sin boks. Ha så olivenolje, salt, pepar og safta frå ein sitron (eller appelsin) over kålen. Klart for servering!
Ekstratips: Meir deig igjen? Lag kanelsnurrar på pinne av restane! Snurr deigen på pinnar, strø på sukker og kanel og steik gyldne over bålet.
Om aktiviteten:
Denne pizzaen er fin på mange måtar. Den kan lagast heil-økologisk, den kan lagast bærekraftig (for er den økologiske purren frå Italia meir bærekraftig enn norsk vårlauk?) Den er kjøtfri, som er bra for både oss og miljøet. OG den smakar kjempegodt!
