Vill salat
Mange plantar som veks vilt kan etast. For eksempel løvetann, hanefot og engkarse.
Du treng:
- Eit oppslagsverk der du kan sjekke om planten er etande
- Nokre små spann til å hauste i
- Liten kniv eller saks
- Skjerefjøl
- Serveringsskål
Slik gjer du:
Hauste:
- Ta med deg utstyret til ein høveleg plass. (Ikkje haust i vegkanten, og sjekk med grunneigar at det ikkje er brukt sprøytemidlar der.)
- Tilpass mengda du sankar til det de har tenkt å ete.
- Plukk forsiktig, bruk heller saks eller kniv så du ikkje dreg opp røtene.
- Ikkje haust alt, då er det vanskeleg for planten å vekse seg ut att.
Tilberede:
Sorter plantane du har sanka. Dobbeltsjekk at du har teke riktige plantar. Du kan godt prøvesmake litt. Kutt og bland dei salatliknande plantane og bland dei først. Strø over til slutt med dei som har finast fargar.
Ekstratips: Vinaigrette! Vinaigrette er ein dressing som gjer salaten frisk og saftig. Du brukar 1 ss eddik, 3 ss olivenolje og smakar til med litt salt og pepper. Du kan og ha litt honning eller krydderurter i vinaigretten.
Om aktiviteten:
Å lage ein vill salat er ein fin måte å verte kjend med eit område. Det er lurt å ta seg god tid, slik at de får ein god sanseoppleving og plantane vert fint behandla.
Det er lurt å ta ein tur og sjekke over området før ein tek med ei heil gruppe på hausting. Då kan du skaffe deg litt oversikt over kva som fins i området, og ta med deg plantar du vil dobbeltsjekke er riktig sort.
